Tolos años se dedica’l Festival Intercélticu de Lorient a una nación celta. Esti añu toco-y a Acadie y por ello hai una carpa pergrande na que se puede disfrutar de la so música, amás de conocer otres munches estalles de la so cultura. Son munchos los grupos que toquen a diario nesti espaciu, concretamente pudimos disfrutar ayeri del prestosísimu conciertu de la vigulinera Louise Vautour. Cuando entamó a tocar facíase imposible nun parar a ver el conciertu y nun par de minutos la carpa entamó a tar llena xente.La moza vigulinera tocó acompañada por una guitarra y, ensin dexar de sonreir nin un minutu, a pesar del cafiante calor qu’invade Lorient estos díes, animó al públicu a dar palmes y a movese al ritmu’l so vigulín.

De nueche, pudimos vela otra vuelta nel Stade du Moustoir, na cuarta Nueche Máxica d’esti 42 Festival Intercélticu de Lorient. Con unes allegres melodíes qu’obliguen a ponese a baillar y un soníu impecable, volvió a animar al públicu nel tiempu reserváu pa esta nación celta canadiense.

Louise Vautour ye de Moncton y namás tien un discu, asoleyáu en 2009 y nomáu « Traces ».

http://www.myspace.com/louisevautour

Filed under: Canadá, Musica