Ayeri tocó Goran Bregovic y la su orquesta nel Space Marine, ún de los escenarios más grandes del Festival. Col su bribante folklore balcánicu el públicu bretón entamo a aplaudir a la su manera, esto ye zapateando fuertemente la tarima de madera que ponen en toos los sitios y les vibraciones ficieronnos botar a toos quisiéremos o no. Nestes camenté que Lorient ye l’únicu llugar del mundiu onde pues aplaudir ensin usar les manes y baillar ensin usar los pies. Tierra máxica esta.

Y ye que non sólo de lo celta vive l’home. Nestos díes pudimos escuchar fado, ritmos orientales y ayeri tocaba el bombo y les trompetes que se traxo Bregovic dende nun se sabe bien onde. Y la xente enllenó’l recintu y divirtiose porque esti nun ye una cita sólo pal folk, ni pa lo celta (entienda caún lo que entienda con esta denominación d’orixen), ni tan siquiera pa reivindica que esisten otres realidades y otros países más allá de lo que pongan los mapes, ye una oportunidá pa ver xente paecía a la tuya sólo que nacieron a milenta kilómetros d’onde tú lo ficiste.

Compitiendo col stan d’Asturies, onde la Patriband y un Elvis de la época de Las Vegas reinen, ta el de la Acadie. Esos franceses de Canada, resumiendo esí una hestoria de 3 siglos de lluches y persecuciones de una minoría francofona n’un pais de fala inglesa, salieron a la rama folixera la familia y presta-yos la polka y toos los ritmos rápidos que queden per encima d’ella. Ayeri la su banda nacional, Tradition, ficieron saltar a casi 1.000 persones nel su stand. Y ye que estos primos del Gran Norte nun escaecieron ná pel camín. resumilo

Filed under: Hestories de la Bretaña