La delegación asturiana participó esti añu nel conciertu de pieslle del Festival, nel Espace Marine, y fízolo de la man de la gaitera Andrea Joglar, xunta Marco Antonio Guardado, Rodrigo Joglar y Silvia.

Los cuatro participaren tamién nes Nueches Máxiques y ufrieron una aplaudida actuación xunta delles de les bandes y solistas más destacaos de los distintos países celtes participantes nel Festival d’esti 2008.

La Delegación asturiana en Lorient torna esti llunes al meudía depués de salir na madrugada de la ciudá bretona onde despidieron la nueche baillando y cantando na carpa asturiana. La bandina La Curuxa foi la protagonista d’esta animación tola selmana y despidió la cabera nueche que pasaron los asturianos en Lorient.

Una pieza musical del compositor asturianu Raón Prada ye la encargada en cada Nueche Máxica de facer compaña a los fueos artificiales nel momentu final d’esti espectáculu con tolos músicos y participantes de los países celtes formaos nel Estadiu de Lorient.

La cabera Nueche Máxica, la sesta celebrada’l vienres pela nueche, brilló como denguna de les otres col bon trabayu de les bandes y grupos participantes que ya foron afinando los pequeños errores que pudieren tener na execución del programa nes primeres Nueches, cuando la lluvia fizo inclusu que nun saliera dalguna d’elles al escenariu. La música que fai compaña a los fueos artificiales y que compuso Ramón Prada pal Festival, depués de qu’estrenare equí Keltikhé con unchu ésitu de públicu y crítica, axunta ritmos y referencies de los distintos países celtes con una eficacia que sorprende inclusu al que yá conoz la obra de Prada.

El Gran Teatru de Lorient foi l’escenariu de presentación en Lorient hai dellos díes del últimu espectáculu del acordionista bretón Alain Pennec.

El concursu celebróse esti añu tamién nel Palaciu de Congresos de Lorient de vienres y con una bona entrada, afitándose como una de les novedaes más aplaudíes del Festival nestos caberos años.

Una bona tonada y un baille cenciellu y efeutivu foron l’homenax que la delegación asturiana ufrió en Lorient a les autoridaes na recepción de la Subprefectura que se cellebra cada xueves primeru d’agostu en Lorient. Nel vídiu, miembros d’Escontra echen un baille na casa del suprefectu en Lorient onde se celebró la tradicional recepción a los países celtes.

La casa del subprefectu francés foi como cada añu l’escenariu de les actuaciones coles que cada delegación participante homenaxea a les autoridaes locales, talamente como fai’l llunes al entamar la selmana nel Ayuntamientu de Lorient. Cada país escueye a ún de los sos grupos representantes pa facer esti pequeñu homenaxe y esti añu, el baille foi la escoyeta de los países de siempre: Asturies, Irlanda y Escocia, qu’ufrieron lo meyor del so floklor. Nel casu asturianu, al baille acompangolu la tonada de la mano d’escontra’l Raigañu, grupu que siempre s’alcuentra tan averáu a la tradición más afitada y afalagada.

La delegación asturiana, compuesta poles Bandes de Corvera y La Reina del Truébano y el grupu Escontra’l Raigañu salieron pasada la medianueche xunta los grupos gallegos pa ufrir una actuación que completaba l’apaición previa nel escenariu de la gaitera solista Andrea Joglar. La Delegación ufrió delles pieces característiques de la música de bandes asturiana y permitió a los componentes d’Escontra’l Raigañu amosar el baille, apegáu a lo tradicional, pero brillante na so execución.

L’Espace Marine vivió cola Banda de Gaites Reina del Truébanu una de les más aplaudíes actuaciones de la tarde no que llevamos de selmana, como amuesa la fin de la so actuación con esta interpretación del “Asturies, Patria querida”.

La Banda que dirixe Luis Feito traxo los sones más occidentales a esta tierra oriental bretona y fízolo al estilu de les Bagad de la tierra, con un set inicial que ya fizo aplaudir ensin parar al públicu asistente na tarde del llunes nel Espace Marine. La Reina del Truébano aposentada nel escenariu, que paecía fechu a midía de la banda, cuayó una actuación mui equilibrada con sones yá conocíos palos bretones y otres composiciones más novedoses perfeutamente encadarmaes.

El Gran Teatru de Lorient foi l’escenariu de presentación del últimu espectáculu del acordeonista bretón Alain Pennec. Un teatru que nun completa l’aforu, pero que si taba enllenu de compatriotes ya incondicionales del maxistral acordionista.

El conciertu entamó alrodiu de les 9:30 de la nueche con una de les sos meyores canciones, que bien pronto amosó la calidá d’una banda que formen xunta Alain, Arore Bréger (arpa), Youenn Landreau (chapman stick), y Stéphane Barbier (percusiones).

Los tres amosaron qu’Alain persabe atopar compangu nun escenariu pa disfrutar enforma. Col pasu de delles composiciones Alain llamó a les tables al quintetu polacu de voces QFTRY, que tuvieron dende esi momentu una  presencia nidia nel escenariu que foi intercalándose y compaxinando con un tañedor de cornamusa. Una presencia qu’ufrió momentos estelares enriiba l’escenariu.

QFTRY son un grupu de voces polaques que ficieron disfrutar abondo a un públicu que los afalagó con aplausos constantes. El concierto terminó alrodiu les 23:30 hores, namái que con un bis, para que después el propio Alain y tola so banda pudieran atender a les persones que s’averaron pa conversar con elli o mercar el so discu.